مش هنتكلم ونقول عن البلاعه الكبيره اللي في وسط مدخل الشارع .. اللي كل شويه بيقع فيها حد وإما بيتكسر أو بيتعور.. وﻻ هنقول عن الناموس اللي قرب يمص دمنا كله ومافيش عربية ناموس تحاول تبص علينا .. ولا هنتكلم كمان عن المجاري اللي كل شويه بتتسد ومحدش بيجي يشملني بعين الرأفه شويه ..
كل ده مقدور عليه وادينا بنتصرف .. سدينا البلاعه الكبيره بشجره مكسوره أي نعم ان الشجره بتعوق السير لكن بنحاول بنتكاتف مع جهاز مدينة 15 مايو ..
والحمدلله جاري السيطره علي الناموس أي نعم إن صدرنا قرب ينسد ويجيلنا ضيق تنفس بسبب الكيتو والرش إلا إننا سيطرنا عليه الحمدلله بالجهود الذاتيه.
. باقي ايه آه .. المجاري .. برضوا دي حاجه بسيطه وعلاجها سهل بالتكاتف مع الجيران وضرب سيخ حديد وخرطوم ميه وكله بقي فل .. سيبكوا من كل ده لاننا خلاص عرفنا نتعامل معاه وبنحله المشكله اللي بجد بقي هي الإناره .
. فين النور الله يركمكم .. حاطين عواميد بدون إناره ده يرضي مين .
. وقبل ما تتكلم وتقولوا في إناره هحدد لكم فين بالظبط إتعبوا شويه كده واوصلوا عندمجاورة 27 عند . (مدرسة السيده خديجه الابتدائيه) الشارع كله مافيهوش لمبة إضاءه واحده والشارع محاط بجبلين يعني اكنك داخل بيت رعب يا فندم ماحدش اصلا بيخرج من بيتهم بعد المغرب نهائي بيخاف .
.. ولو اتمشيت شويه في الطريق الجديد عند المقابر نفس الحال ونفس التشبيه منطقه جبليه فيها أعمدة نور بدون نور ..
طب إيه ﻻزمة العمود من غير اضاءه بس..
أحنا عارفين إن الحكومه شاكره بتعمل اللي عليها واعباءه كثير .. لكن ده مايمنعش نظرة عطف تشمل ﻷهالي هذه المنطقه أقله لتجنب الحوادث ..
ومش ﻻزم نوضح زي ايه لانكم اكيد فاهمين منطقه جبليه محاطه بجبلين وبدون اناره هيظهر فيها ايه … والحدق يفهم بقي … طولنا عليكم لكن محتاجين دعم بجد ..محتاجين نشوف النور نبوس إيدكم … ……بقلم / شيرين جاد
