يوميات زوج مطحون الحلقه الثانيه؛: للمبدعه /شيرين جاد

كتبت الاعلامية والصحفية /شرين جاد

مدير مكتب -حلوان

يوميات زوج مطحون الحلقه الثانيه؛:

. بكل الأشواق والحب من الزوج .. ومسك ايديها .. وباس دماغها .. وحط دراعه عليها ..

الزوج :

تعالى يا روحي علشان أعمل العشا.. الزوجة : شيل ايدك من عليا .. انا مش طايقة نفسي من ساعة ما صحيتني ..

الزوج :

طيب يا روحي .. اللي يريحك .. صدقيني مش قصدي إني أصحيكي ..

الزوجة :

خلاص خليصنا .. ما انا صحيت خلاص .. ودخلا المطبخ مع بعض

الزوج :

ممكن يا حياتي تقعدي زي الأميرة على الكرسي وانا هعمل العشا .. بس اتكلمي معايا وانا شغال …

الزوجة :

طيب .. بس متتكلمش كتيير ..

الزوج :

طيب .. اخبارك ايه في شغلك .. الزوجة : كويسة ..

الزوج :

ماتيجي نخرج بكره .

. الزوجة :

معلش مش هينفع .. عندي معاد مع صحبيتي على النت ..

الزوج :

يا روحي ابعتيلها إيميل وقوليلها إنك مش هتقدري تدخلي ..

الزوجة :

مقدرش .. ده معاد بقاله كذا يوم ..

الزوج :

طيب .. أوكي .. خليها بعد بكره .. موافقة ؟؟

الزوجة :

لا مش موافقة .. علشان رايحة للدكتورة ..

الزوج :

بكل لهفة .. بجد يا روحي ..

الزوجة :

ايه هوه اللي بجد !! .. ده دكتورة السنان .. الزوج : بكل إنكسار .. معلش كنت بفتكر إنك حامل .. الزوجة : حمل ايه وهبل ايه بس .. ما تفوق بقى .. الموضوع ده مش دلوقتى ..

الزوج :

يا روحي ليه بس .. ده الأولاد نعمة من ربنا وهيملوا علينا البيت ..

الزوجة :

هوه انا يعني اعترضت .. انا بقول مش دلوقتى .. وبعدين علشان أبحاثي وشغلي .. مش فاضية للكلام ده ..

الزوج :

يا حبيبتي ليه بس .. ما انتي عارفة انا نفسي تكون ست ناجحة .. انتي عارفة كمان إني واقف جنبك في كل أبحاثـك ..

الزوجة :

انا عارفة .. لكن انا مش بفكر في الموضوع ده غير بعد الماجيستير ..

الزوج :

نعم!! ليه بس يا روحي .. ده الماجيستير لسه علشان يخلص مش أأقل من 3 سنين ..

الزوجة :

وانتا مستعجل على ايه ..

الزوج :

يا حبيبتي اسمعي بس .. الراجل لما بيحب زوجته زيي كده بيكون نفسه في أولاد منها ..

الزوجة :

طيب ممكن تأجل الموضوع ده بعدين .. ويلا كُل علشان تنام وانا كمان أروح أنام .. وابتدا الزوج ياكل ..

الزوج :

يا حبيبتي .. مش هتاكلي معايا ؟؟

الزوجة :

لا مش عايزة .. نفسي مسدودة ..

الزوج :

علشان خاطري يا روحي … مش هعرف أاكل غير لما أشوفك بتاكلي معايا ..

الزوجة :

يوووو .. انا مش بحب الغصب ده كل شوية ..

الزوج :

يا حبيبتي انا عمري ما غصبت عليكي في أي حاجة .. انتي عارفة إن حبنا مبني على التفاهم ما بينا ..

الزوجة

: طيب طيب .. خلاص .. هاكل هاكل .. انتا مش بتعرف تنام غير لما تشوفني ولا بتعرف تاكل غير لما تشوفني باكل .. مش عارفة ايه موضوع المودة والمحبة والأُلفة اللي انتا ماسك فيه ده !!

الزوج :

أيوه طبعا يا روحي … انتي لو تعرفي حبي ليكي قد ايه .. كنتي عذرتيني .. ده انا بعد الساعات علشان أخلصشغل وأرجع البيت أشوفك ..

الزوجة :

كتر خيرك .. ربنا يعينك في شغلك .. الزوج : انتي نسيتي الموضوع بقى ولا ايه ؟؟ الزوجة :

موضوع ايه ؟

الزوج :

موضوع إننا نخرج مع بعض

الزوجة :

ما انتا توهتني بموضوع الأولاد

الزوج :

طيب خلاص نخرج بعد بكره .. علشان خاطري وافقي بقى .. ده هيبقى يوم الخميس .. وصابح أجازة .. ممكن ؟؟

الزوجة :

مممممممم … أوكي موافقة .. بس على شرط !! الزوج : ايه يا حبيبتي ؟؟ الزوجة : بعد ما نخرج .. نروح لماما ..

الزوج :

وفيها ايه يا روحي .. انتي عارفة يا روحي إني بحب حماتي جدا .. مش كفاية جايبة العسل ده ..

الزوجة :

أوكي اتفقنا .. يلا بقى قوم نام ..