الحلقه الخامسه السفر من يوميات زوج مطحون للاعلامية والصحفية /شرين جاد

 بقلم الاعلامية والصحفية /شرين جاد

مدير مكتب حلوان

وكعادته اليوميه استيقظ الزوج على اوتار الموسيقى الكلاميه من تأليف الزوجه

الزوجه:

انت يا افندى كل يوم هفضل فى الموشح ده لازم تقرفنى بالمنبه بتاعك ده كل يوم انا مالى تصحى 6 ده ذنبى الزوج:

الصحيان بدرى نشاط حبيبتى قومى قومى كفاكى كسل

الزوجه :

اقوم 6 ليه والنهارده الجمعه انت مجنون مش كفايه يومك النحس امبارح وخروجتك المهببه

الزوج :

اسف حبيبتى غصب عنى والله يعنى انا كنت قاصد انا هعوضهالك النهارده هنساف ر النهارده العين السخنه ونرجع اخر النهار مفاجأه صح

الزوجه:

سخنه ايه وبارده ايه انا عاوزه ارتاح انت زهقتنى باسلوبك ده ودور الحنيه والحب اللى داخلى فيه ده قرفت

الزوج:

حبيبتى انا عاوز اعوضك عن خروجه امبارح اللى ما اتبسطيش منها

الزوجه:

روح هاتلى خاتم ولا غويشه تعويض وسيبنى انام ؛ اووووف ايه ده حتى يوم الراحه متحرم عليا.

الزوج:

حبيبتى انا ظبطت كل شئ الاكل والساقع والعصاير والمايوهات ووضبت الشقه كمان يدوب هتلبسى بس ؛ يالا حبيبتى وحياتى .

الزوجه:

خد صحابك وروح وحل عنى انا مش رايحه فى حته ومتزهقنيش اكثر وامشى بقى هتطير النوم من عينى .

الزوج :

خلاص زى ما تحبى وخرج الزوج يتمشى فى الشارع مكسور كالعاده؛ وفى طريقه يقابل جاره وزوجته واولاده واخت زوجته بينزلوا الشنط فى العربيه يسافروا للاستجمام يوم

الجار:

اخبارك ايه ايه مصحيك بدرى

الزوج

: يحكى له ما حدث

الجار:

ولا يهمك تعالى معانا وتغير جو وتتفسح وتعيش كام ساعه هنا.

الزوج:

يفكر لحظات وسرعان ما يقبل العرض ويسافر معهم.

الجار:

وصلنا بالسلامه يالابقى كله يشق طريقه ونتقابل هنا الساعه 4 العصر عشان نروح.

الزوج:

ياخد شنطته ويمشى يتجول على البحر ويشوف الطبيعه الجميله ويلاقى كافيه يقعد يفطر ويشرب كوبايه شاى وينده على المتر .ويبص بعينه يلاقى واحده بتتبسملوا من بعيد وبتشاورلوا والزوج متلخبط مش عارف يعمل ايه وهى بتقرب وهو العرق عمال ينزل من كل جسمه ومره واحده يبتسم هو انتى قالتلوا افتكرتنى قالها طبعاا طبعاا … انتوا هيقتلكوا الفضول وعاوزين تعرفوا دى مين صح ..ههههه .صعبتوا عليا هقولكم دى كانت زميلته فى الجامعه وبتحبه اوى بس هو كان بيحب مراته اللى كانت زميلته برضوا .يالا نكمل بقى ..

الزوج :

اخبارك ايه واتجوزتى ولا لسه وعامله ايه ياااااه فكرتينى يا شيخه بالايام الجميله .

الزميله :

انا اتجوزت ولسوء الحظ اطلقت بس من غير اولاد ما اتفقناش مع بعض ؛ الحمد لله انه بان قبل ما نتدبس فى اولاد.

الزوج :

الحمد لله ومتزعليش انتى حلوه وبكرا تتجوزى احسن منه ؛؛ ها عندك فيس وتليفونك كام

الزميله :

اه عندى خد اهو وادى التليفون يا سيدى ع فكره احنا كل شهر بنعمل رحله الزملاء كلهم .

الزوج :

والله طبخدونى معاكم ونرجع ايام الجامعه . والزميله والزوج قعدوا يرغوا ويرغوا لحد ما عدى معاد العصر عشان يروح وفجأه افتكر قال ياخبر هروح ازاى .

الزميله :

ابتسمت وقالتلوا ولا يهمك انا هوصلك بعربيتى هى صغننه صحيح بس تسد.

الزوج ؛:

يركب السياره معاها ويرجعوا على مصر وتوصلوا للبيت ويتفقوا على الكلام مره ثانيه على الفيس بعد ما يضيفها ويطلع الزوج مبسوط اوى ويلاقى مراته نايمه يدخل يقبلها كالعاده قبل ماينام ..