الشمس تتدلى من فوق رؤوسهم، يتصببون عرقاً من الأجساد، مشقة وعناء طوال اليوم منذ مطلع الشمس حتى الغروب، فدرجة حرارة الطقس تتعدى 40 درجة مئوية وطبقاً للظروف الجويه الصعبه ، فعمال البناء من نجارين وحدادين وبناة الطوب، لا يحميهم شىء من حر الشمس، ولا فرار من العمل مع درجة الحرارة المرتفعة، ورغم التعب الذى يملأ أجسادهم، فإن السعى وراء لقمة العيش هو ما يدفعهم للخروج رغم أشعة الشمس المحرقة لذلك لايجب علينا ان نغفل هذه المهنه لانهم يتحملون العديد من الصعوبات التي اضطرت الحياه ان تجعلهم فيها.
في البداية يقول يوسف زكي اسحاق من محافظة بني سويف، البالغ من العمر 50 سنه، انا شغال نجار مسلح من 30 سنه وانا اتعلمت الشغلانه دي مع ناس نجارين قبلي واشتغلت ورا صنايعيه واتعلمت الشغلانه وبقيت صنيعي في ست شهور وحاولت من الاول اتعلم منهم كل حاجه بسرعه لاني من الاول حبيت الشغلانه وبدات من وانا عندي 20 سنه او25 سنه وكانت بشتغل عامل في السوق ورا بنايين وورا مبياضين وكمان نشيل فرش يعني الحمد لله الواحد بيحاول يلقط رزقه علشان يجيب لقمه العيش الي تقدر تعيشه هو واولاده
واضاف اسحاق، انا كنت ببدا يومي في الشغل وكنت بصحي الساعه 7 وبرجع الساعه 5 وساعات كنا بنبات في الشغل حسب ظروف الشغل يعني لو ورانا حاجه بنعملها ممكن نمشي اما خلصها احسن ما تتراكم علينا كله بيمشي الحمد لله وشغلنا ما بيبقاش دايم كل يوم بس لو مع المقاولين ممكن تريح يومين ولكن شغلنا انت ممكن تشتغل يوم وتريح عشره واكيد مش دايم واي نجار مسلح مش دايم في اي مكان حتي في الشركات ممكن تكون شغال في الشركه وبرده ما تقعدش فيها كتير علشان نقص في عده نقص في الخشب وما فيش كفايه انك تقدر تتحمل او تشيل سقف او عمدان
وتابع يوسف، انا حبيت الشغلانه لاني كنت عمال وبعديها بقيت صنايعي يعني من عماله لصنايعي لاني في فرق بين عامل وصنايعي العامل ده بتبهدل في اي مكان انما الصنايعي لو بياخد عشره جنيه اسمه صنايعي يعني ليه قيمه والناس بتحترمه وليه كلمته والمقاول ممكن يتخانق مع العامل لكن الصنايعي يعمله الف حساب لانه هو اللي ماسك الشغل كله لانه بيشتغل معاه وعارف الشغل كله ولومشاه ممكن ميلقيش صنايعي غيره بالنسبه لاي صنايعي بيعرق وبس احنا كنجارين مسلح بنبقي مكشوفين تحت الشمس وبتكون الشمس صعبه جدا بس طبعا ربنا بيكون معانا وبنستحمل كل ده وبنعدي وكمان منظر الشغل بتاعنا عايز هندسه لان في شغل مبيقدرش يكملوا المهندس ويعملوا الصنايعي علشان كدا ربنا بيقوينا وما بنحسش بالشمس وبتلاقي اليوم عده ومفيش حاجه هي الشغلانه صعبه وكمان فيها مخاطر كتير يعني ممكن يخش مسمار في رجلك تقع من علي لوح من الالواح الي واقف عليها وانا بشتغل قبل كدا دخل في رجلي مسمار في ناس بتاخد عليه حقنه تاتوس بس انا بروح لسعه بالسيجاره وبكمل الشغل عادي في ناس بتقع بتموت وهو لو ربنا رايد اني اموت في الشغلانه ديه محدش بيهرب من قدرره بس هنعمل ايه احنا بنشتغل علشان نقدر نعيش وانت عارف كل حاجه بقت مولعه والواحد علي قد حاله وغلبان علشان كدا لازم نشتغل اي شغلانه المهم نقدر نعيش رغم ان كانت صعوبتها
وانا مره حصل ليه ان عيني اتعورت في الشغل الصراحه صاحب الشغلانه ما سبنيش يعني الحمدلله .بس قعدت حوالي شهرين مشتغلتش خالص وفي واحد بيديلك يوميتك ملهوش دعوه بحاجه بتجرالك وبنسبه لمهنتنا يوم بيوم والباقي علي الله
ولو بصيت لحوار التامين مش هلاقي هاكل عيش وفي ناس في شركه يخليهم يعملوا التامين علي حسابهم, وانا حابب الشغلانه دي ولو في شغلانه تانيه عمري ماهسيب شغلانتي الاصليه لان مفيش واحد قاعد في المهنه دي بقالوا ياجي 30سنه ويسيبها يعني ودلوقتي كله بيبص للمديات يعني لو لقيت اي شغلانه زايده الف جنيه عن شغلانتي هروح ليها لكن كله اقل منها علشان كدا انا مكمل فيها
واول قبض خدته وانا عامل كنت باخد 7 جنيه وبعد كدا لم راحت مساعد نجار كانت باخد9جنيه واول ما بقيت نجار يوميتي كانت 15جنيه وبعدها بقيت حسب ظروف الحياه لان الجو بيغلي اكيد يوميه النجار بيترفع سعرها ودلوقتي يوميتي 120جنيه وبره مع المقاولين 160جنيه علي حسب يعني يوميتي بتكفيني في بعض الاحيان وبشكر ربنا علي كل شي بس الصعب اني ممكن اشتغل اسبوع واقعد طول الشهر فابكدا بتكون صعبه عليا وعلي اهل بيتي يعني ممكن يكون الحال كويس وممكن تكون الدنيا مذنقه وانا ارزقي علي باب الله
الحاجات اللي اتعلمتها وحاولت القطها بسرعه الرسومات والخرائط والموقع اللي هتخش عليه يكون في استشاري هو اللي ابيرسم العماره من نقطه البدايه للنهايه وبيسلم المهندس والمهندس بيديه لصنايعي اللي هو زينا وشغلانه النجاره الوحيده اللي بتحس هي هندسه وفن لن النجاره اساس كل حاجه في البناء وبعدها يخش البنا والمبيض والكهربائي يعني مفيش واحد بيمد ايديه الابعد نجار المسلح يعني كدا الايفهم معني النجاره يقدر يوميه الصنايعيه
انا متجوز ومن اسره متوسطه الحال ومعايا 3 اولاد واكبر واحد فيهم في الاعداديه وانا قاعد في القاهره بس انا اقامتي الاصليه في بني سويف وعلشان كدا شغلي يحكم عليا اني اقعد وده غصب عني علشان لقمه عيشي هنا في القاهره وبنزل ازورهم طبعا في الاجازات وانا الحمد لله مكفيهم كل احتياجتهم وكل اب لازم يتعب علشان خاطر ولاده يرتاحوا
