( الناس والطمع )..شعر/عصام الصاوي

********
الناس عماها الجشع والمادة عمياهم
وبطون ملاها الشبع والدنيا شغلاهم
ومص دم الغلابة حاجة أساسية
إزاي تكون العيشة؟ وإحنا وياهم.
********
رحت اشتري لعيالي حلاوة المولد
فرحان قبضت المرتب وقلت:عدوا لي.
لقيت أنا سعرهم عالي وخيالي
ضيعت أنا الراتب وقربت أرهن هدومي
*********
كلمة لمسؤولين البلد بجد مش بهزار.
سعر الحاجات ارتفع والحاجة ولعت نار.
أصغر عروسة مولد في السوق بمية جنيه.
سايق عليكو النبي لتخفضوا الأسعار.
**********
حرام يروح دعمنا لناس ماترحمش.
وجيوب ملاها الجشع وعقول ماتفهمش.
قومي بقى اتحركي ياوزارة التموين.
صوت الفقير اتقطع وإزاي ما نزعلش.
**********
في عيد ميلادك يانبي أنا زعلان.
فين الرحمة بين العباد بتاع زمان.
الناس بتأكل بعضها عيني عينك.
والفوضى صارت بين العباد عنوان.
***********
في عيد ميلادك يانبي لازم نحتفل بصفاتك.
لازم نقرا في سيرتك وأخلاقك.
شبابنا بعد عن سنتك قوي كتير.
الفنانيين قدوتهم للأسف مش أصحابك.
***********
في عيد ميلادك يانبي لازم نفوق.
في عيد ميلادك لازم نبص لفوق.
لازم نجدد النية….. في حبك
ولازم كمان يانبي ياخدنا الشوق
***********