صباح الخير عليكم اهلي واخواتي واصحابي .
ماتيجوا اكلمكم عن حاجه ايجابيه تفرحكم مريم نجمه وبطله فوق العادة .بطله عالميه وأولمبياد لا وبطله محليه وعندها اكتر منن ٥٠ ميدالية . محليه وعربيه وعالميه .
فنانة ورسامه وبتصمم اغلفة كتب لكبار الكتاب .
عارفين دي مين؟ ما تيجوا نشوف حكايتها ايه؟ دي مريم وجيه بنوته جميله ضحكتها بترد الروح .مريم حطمت كل القيود والعقبات اللي قابلتها . واصبحت بطله .
لا مش اي بطله دي بطله عالميه يتحاكى بها العالم كله .من طراز خاص .. دي بطله سباحه عالميه . وحاصله علي العديد من البطولات العالمية والقارية والعربية والمحلية ..
مريم الدكتور زمان قال لباباها ومامتها . انها هاتتعبكم ومش هاتبقي زي باقي الولاد.. ادولها حقنه هوا وموتوها افضل .. لأنها مش هاتبقي كويسه .. والناس هاتتريق عليها .. ابوها وامها عاشوا اصعب لحظات حياتهم . كانوا مدمرين بمعني اصح .. بص الضني غالي . غالي قوى فوق ما تتخيلوا . قرروا يواجهوا الدنيا ويتحدوا بمريم ..
اتحدوا جميع الاعراف والبرتوكولات والعادات السيئة بمجتمعنا العربي .. اتحدوا نظرات الناس لمريم . واشتغلوا علي مريم كتير جدا .. وكان فيه شخصيه سوبر او بمعني اصح ( Super women ) شغاله في الخفاء وبكل ما تملك .
واستقبلت مريم بكل راحه وعشق وحب ماحنا قولنا ان الضني غالي، الشخصية دي تبقي ماما مريم الست هناء اه ى اسمها هناء. علشان ربنا هناها بمريم فبقي اسمها علي مسمى.
المهم ان الست هناء اللي قررت تصنع بطله من مريم تخلي العالم كله يتكلم عنها ، وزى ما صفاء مصطفي جعلت من بنتها لبني بطله سباحه عالميه وحاصله علي اكتر من ١٢٠ ميدليه عالميه وعربيه وأفريقية ومحليه ..وعلي فكره تبقي زميله مريم وماما مريم ولبني اصدقاء كفاح .كمان هناء ماما مريم جعلت بنتها عالميه .
انا شخصيا بفتخر بيها جدا .. دلوقي مابقاش عندنا حاجه اسمها متلازمه داون بقي عندنا المذيعه الجميلة (رحمه) واستاذ الجامعة والممثل والرياضي قريبا هايبقي عندنا الدكتور والمهندس ، النهارده اتغير اسمهم من متلازمه داون لأصحاب الهمم .،
عارفين يعني ايه اصحاب الهمم . يعني الناس اللي بفتخر بيهم .الناس اللي بيرفعو اسم مصر فوق في السما .الناس اللي تفتخر بيهم وترفع لياقه قميصك وتقول دول من بلدى .
النهارده مريم بقي عنها معرض للرسم .وبتدرس في فنون جميله علشان تبقي اول متلازمه داون يحصل علي منحه للدراسة في الفنون الجميلة .وربنا تشرف ماتيجو كده نعرف مين هي مريم الجميلة دي .
الاسم.. مريم وجيه فؤاد ابو السعد السن.. 20 سنه مريم.. من فئة الدوان سندروم بطلة عرب في السباحة 2014 حاصله على 50 ميدالية جمهوريه واتحاد واولمبياد اول متلازمة داون تلتحق بكلية فنون جميله دراسات حره بمنحه مقدمه من وكيل الكلية فنون جميله شاركت في مسابقات دوليه كثيره منها ملتقى أولادنا للفنون لذوي القدرات الخاصة على مدار ثلاث سنوات بمشاركة 36 دوله اجنبيه وعربيه
كما شاركت في مهرجان همسه الدولي مع كبار الفنانين التشكيلين وكرمت لمشوارها الرياضي والفني وشاركت أيضا في مسابقة حوار الاديان السنه السابقة وكرمت فيه كم اهدت اللوحة لفضيلة الإمام الأكبر دكتور احمد الطيب
واخر أعمالها تنفيذ غلاف كتاب للمنتج ورئيس DMC استاذ هشام سليمان سابقا كتاب 100 نصيحه ونصيحه والجديد ان مريم ها تنفذ غلاف كتابي عشق الروح وبدأت بالفعل الشغل عليه .
بحبك يا بت يا مريم . بنت ايه بقي .بحبك يا اجمل فنانة . علي فكره عندي ليكم حكايات عن ابطال من اصحاب الهمم استنوني بس وانا هاحكيلكم عنهم .
فيه مليون مريم موجوده في عالمنا حطموا القيود بفضل ربنا ثم محاربين وراهم واثبتوا للدنيا انه مفيش مستحيل. كتير مش ناقصهم حاجه وحاسيين بالعجز.
نصيحه اتعلم من اجمل بنوته مريم قصدي الفنانة التشكيلية مريم وجيه.
