منارتنا اليوم تتحدث عن نفسها بقصة كالخيال في روعتها
اليكم حديثها:
اعرفكم بنفسي أنا أمل الشوادفي من مواليد قرية الروضة تابعة لمركز فاقوس محافظة الشرقية عندي 29 سنة قصتي غريبة شوية حصلي اللي مكنتش اتوقعه بعد حصولي على الثانوي الفني التجاري كان عندي أمل أكمل تعليمي ولكن كان ظروف أهلي صعبة وتغاضيت عن حلمي
بدأت اشتغل في أحد شركات الملابس في العاشر من رمضان ويوم 10 أغسطس 2010 بالظبط عملت حادثة أثرت على النخاع الشوكي بتاعي وأدت إلى حدوث شلل رباعي
عملت عملية جراحية علشان تثبت الفقرات غير العلاج الطبيعي، كان الموضوع بالنسبالي زي الضباب الاسود اللي عمى عيوني و عجز حركة كل جسمي وليس أجزاء منها دخلت في حالة نفسية صعبة جدا جدا .
وفكرت أن هجلس بعد كده على كرسي متحرك كانت أصعب بس حاولت اتأقلم لأن مفيش غيره ، كانت حركتي بسيطة في الأول
لكن قضاء وقدر مليش تدخل فيه نظرات الناس ليا طبعا ودي ممكن تتخيلوها إنها سيئة جدا لأبعد الحدود
أكيد مش مستنيه تعاطف من حد بالعكس محتاجه حد يقويني ويحسسني أن كاملة، في يوم من الأيام شاهدت بوست على الفيس لأحد الفتيات ذوي احتياجات الخاصة، ما هو بدأ ناس تبعد عني بعد الحادث وناس قربت الدنيا لا تدوم لأحد
واللي جرب أكيد حاسس بكل كلامي كلمت البنت نسيت أقولكم أن البوست كان مضمونه إنها حصلت على بطولة لأحد الألعاب الرياضية، ودا خلى عندي فضول أعرف ازاي وفين
توصلت معاها وعرفت مكان النادي اللي بيقدم لهم الدعم اتفقنا إننا نتقابل واعرف أكتر
وبالفعل انقابلنا وعرفت وذهبت للنادي” نادي أهلى فاقوس”
قبلوني ودعموني فكرت بين كذا لعبة اختارها كان عندي تشتت بس اخترت لعبة تنس الطاولة مستغربين صح
همسك المضرب ازاي وأنا معنديش تحكم في كف الأيد بس لا عندي إرادة ولازم اثبت أن أقدر
فكرت استخدام رباط الضغط بكف الأيد، صعوبة وما بعدها أسهل بالفعل بعد مرور سنه او اقل من التدريب ،دخلت بطولة تنس الطاولة ،وحصلت علي مركز رابع جمهورية
وشاركت في مسابقة، جري بالكراسي المتحركة، لمسافة ٢كيلو وكانت بمحافظة السويس، وكان عدد المشاركين ٥٠٠ وقد حصلت علي مركز ١٦٤
وحاليا بقالي دلوقتي 3 سنين وبتمنى الحياة ترجع تاني ربنا يرفع عنا البلاء
بشكر ربنا صاحب الفضل الكبير في تغيير حياتي و طبعا لأمي واللي ليها فضل بعد ربنا والنادي والكابتن اللي تعبت معايا
وعايزة أقول حاجة أخيرة الكرسي بقى بالنسبالي أسلوب حياة صديقي الصدوق، واتمنى تغيروا نظرتكم لينا