عفت المؤسسات الخيرية من ضريبة القيمة المضافة وكذلك الجزائر دون التفريق ان كانت هذه المؤسسات ملك الدولة او لا ففي النهاية كل المؤسسات الخيرية ملك لمصر وتابعة لوزارة التضامن الاجتماعي المصرية وكلنا نعمل من أجل مصر… كونوا عونا لنا لا علينا ففي النهاية الاف من الانفس بل ملايين هي المستفيدة…
بوست أمس ؛ من سنة ونص بالظبط تواصلت مع البرلمان ووزير المالية ووزيرة التضامن وطالبت باعفاء المؤسسات الخيرية من ضريبة القيمة المضافة التي تمثل علينا حملا وخاصة تلك التي لديها مستشفيات مجانية كل هدفها خدمة المحتاج ومساعدة مصرنا الحبيبة، فمصاريف انشاء وتجهيز المستشفيات والعلاج والمستلزمات الطبية والادوية يكلفنا مئات الملايين من الجنيهات كل عام.
خطابات وطلبات واجتماعات مع اعضاء البرلمان المسؤولين عن المجتمع المدني وخطابات لوزيرة التضامن واجتماعات وكذلك وزارة المالية ومصلحة الضرايب، ولا انكر بجد اهتمام النواب والوزراء بانفسهم بالرد وايجاد حلول ولكن القانون كان فوق كل اعتبار !!!
وصدر رد بعض المسؤولين دون ذكر اسماء محبط جدا لدرجة اني قعدت اضحك من كتر قهرتي ولولا والله العظيم حب الواحد في عمل الخير وحب بلده وانه لا يبتغي غير وجه الله كان جالي احباط وقعدت في البيت بلا شغل ولا وجع قلب كفاية الي بنشوفه كل يوم وقلة راحة ونوم علشان ربنا اخترنا اننا نكون سبب في انقاذ ارواح ضحايا الحروق وعلشان اهل مصر مش ذنبها ولو دور المجتمع المدني مش محسوس الى الان والمستشفيات الخيرية الي بتعالج الاف كل سنة غير مقدر في الارض اكيد حيقدر في السماء…
اما الرد بقه تفتكروا كان ايه؟؟؟ دكتورة احنا درسنا الموضوع ولقينا انه الجامعه الامريكية برضه تعتبر مؤسسة خيريه غير قابلة للربح ولو عملنا ليكم اعفاء من ضريبة القيمة المضافة لازم ولا بد نعمله ليهم..
رديت وهل يعقل حضرتكم تساووا بين مؤسسات خيرية ومستشفيات بتعالج الاف كل سنة بالمجان من الشعب المصري المحتاج، مؤسسات يتشيل جزء من الحمل عن الدولة وبتنمي قرى وبتعيل عائلات وغارمات وبتعلم وتشغل بالجامعة الامريكية الي بتاخد من كل طالب كل سنة نص مليون جنيه مصاريف بقة ده يرضي ربنا،بقة ده كلام حد يعقله برضه ويرضي مين؟
يا فندم احنا يندفع ملايين من الجنيهات لتسديد ضريبة القيمة المضافة سنويا الفلوس دي اولى بيها اننا نصرفها في اوجه الزكاة الي كل مؤسسة متخصصة فيها والمستشفيات الخيرية تقدر تعالج بيها الاف اخرى.
واتقفل الموضوع على كده وكملنا بننقذ القانون المجحف بينا وقابلين اننا نعامل كاننا شركة استثمارية ولسنا مؤسسة خيريه علشان مؤمنين بدورنا وهدفنا واضح.
فوجئت الان بخبر اعفاء بيت الزكاة والصدقات المصري فقط من ضريبة القيمة المضافة طبعا خطوة هايلة بس والله العظيم احنا كمان في امس الحاجة لده…
فرجاء من متخذي القرار النظر الى مؤسسات المجتمع المدني والمستشفيات الخيرية ومساندتهم واعانتهم ومعاملتهم بالمثل فدورهم لا يقل اهمية عن اي مؤسسة اخرى والله كل ده حبا في الخير فكونوا عونا لنا كي نؤدي دورنا في خدمة بلدنا ومساعدة المزيد من المحتاجين..
