✍️..صدى الكلمات.. نحنا من بلاد الكرم.. شو عملتوا فينا..؟؟

بقلم خالد بركات..

* ” *‏أيوجّعني الزمان والله ربي..
‏ أم يضرني الناس والله حسبي..؟؟
‏أينبت بي شك والله يقيني..
‏ أو يضيع لي حق والله وكيلي.. “**

ما منعرف نجوع ولا نمد ايدنا..
نحنا من بلاد ما بتعرف تشتري غرض بالوقية وبالحبة وبالفلت، وبتتباهى بغرف المونة ببيوتها متل ما يتباهوا بالمكتبات والأثاث..

نحنا من بلاد الكرم فيها شهامة ونخوة
وكل اهل البلاد هوايتهن العزايم ومد السفر على أنواعها بالسخاء والكرم، وما بتعرف تسأل الضيف إذا جوعان حتى طعميك ،نحنا منحط السفرة ومنقول للضيف شرّف الاكل جاهز، وبتخزقلوا تيابوا بالعزيمة..

نحنا من بلاد صبحيّتها أقل شي 3 ركاوي، ووين ما قطعت فيها، بتسمع حول اشرب قهوة ميّل يا عمي (حماتك بتحبك القهوة جاهزة)..

نحنا من بلاد الشجر فيه المثمر بديارنا بياكول منو أهل الرزق وكل أهل الحي وكل ضيق واذا بتعمل زيارة لأصحاب البساتين ما بتطلع من عندن الا وبترجع محمل بالخضرة والفواكة..

ونحنا من بلاد بتتزوج فيها البنت وتبقى مونتها من بيت اهلا بتوصلا كل سنة عا بيت زوجها..

نحنا من بلاد منقول فيها (الإيد الفاضية مجوية) ما بيسوى تروح زيارة أو مناسبة بلا هدية..

نحنا من بلاد منقول نيال العندو مرقد عنزة بلبنان، صرنا تقول نيال العندو عنزة لياكل ويشرب ويمكن يفرش جنب العنرة لينام..

نحنا من بلاد ما بيتسكر فيها باب البيت من الصبح للمسا وبترحيت من القلب بكل ضيف..
وبيقولوا فتاح بيتك وافتخر او سكروا ونستر..

نحنا من بلاد بتفكر بأكل العصفور منتركلو ثمار بالشجر والثمرة ناقدها العصفور صارت أطيب..

نحنا من بلاد أستاذ المدرسة عنا قدوة بتعليمه، وغناه بأخلاقياته وعقلاته وتضحياته، أصبح فرجة بفقر مصرياته ،ويترجى ليحصل راتبه..

نحنا من بلاد كنا نداوي الألم بكباية ليموناضة، صرنا نذوب حبة دوا بكباية لتشرب العيلة كلها.

نحنا من بلاد كان اسمها مستشفى الشرق..
صرنا نفتش غرب وشرق ونترجى لنلاقي دوا واوكسيحين ولوازم لمستشفياتنا..

نحنا من بلاد ولد فيها حسن كامل الصباح..
اديسون الشرق وصرنا نسهر وننام عالمصباح..

نحنا من بلاد كنا سويسرا الشرق، ويزورونا من كل البلدان ونتغنى بالسياحة وببئتنا، صاروا السواح يزورونا ليصوروا كوارثنا وزبالتتا..

نحنا من بلاد كنا تفرح كل العالم بنكتتنا واخبارنا وضحكاتنا،صرنا مدعاة للشفقة لما يشوفوا الدمعة بعيونا وبعيون اطفالنا وأمهاتنا واباءنا..

نحنا من بلاد ما منعرف نجوع ولا نمد ايدنا..
كيف يا مجرمي العصر يا بلا ضمير وإيمان، بدكن تجوعوا شعب كريم وشبعان وعزيز النفس..؟؟!!

كيف عم تذلوا الناس العزيزة النفس..؟؟
قبح الله وجوهكم في كل لحظة صرنا عم نتقاتل على غالون زيت وكيس حليب وربطة خبز،و….
الله لا يسامحكم لا دنيا ولا اخرة..
نحنا من بلاد ،اغلى بلاد وباقيين فيها ورح ترجع احلى ما كانت لما يفلوا أهل الطغاة والفساد..
نحنا من بلاد شعبها مؤمن بالله والأمل كبيررررر.