✍️..صدى الكلمات.. الستر وأنواعه..

بقلم خالد بركات..

وَكَيْفَ تَصْبِرُ عَلَىٰ مَا لَمْ تُحِطْ بِهِ خُبْرًا..
كلما ازداد فهم الإنسان وعلمه وبالقناعة بمآلات الأمور والعواقب كلما ازدادت طاقة صبره..

عن الرائع الدكتور مصطفي محمود..
كان فيه رجل يبيع جرايد جنب حديقة الحيونات بالجيزه، وكنت اعدى عليه كل يوم بعد توصيل زوجتي للعمل، اقف معاه شويه وبعدين اشتري منه جريدة الأهرام علشان اتعلم اسلوب الكتابه لكن علمني حاجة أهم من ذلك..
هذا الراجل علمني درس مهم جداً للعمر..
لما كنت أسأله ازيك انهاردة يا حاج يقول لي :
الحمدلله في نعمة الستر..
فاندهشت بجوابه وسألته ليه الستر تحديداً..؟؟
قال لي : لأني مستور من كله..
قلت له ستر ايه يا حاج ده إنت البلوڤر بتاعك فيه رقعتين مختلفين اللون..!!
فلما أحس بغبائي فبادر بالشرح..
‏قال الستر ده أنواع :
‏* لما تكون مريض بس قادر تمشي علي رجليك ده ستر من مذلة المرض..!!
‏* لما جيبك يكون فيه جنيه يكفيك تنام متعشي حتى لو عيش حاف ده ستر من مذلة الجوع..!!

* لما تكون تملك ملابس تحميك من البرد حتى لو مرقعة ده ستر من مذلة البرد..!!
*؛لما تكون قادر تضحك وأنت حزين لأي سبب ده ستر من مذلة الكسرة..!!
* ‏لما تكون قادر تقرأ الجريدة اللي في ايدك ده ستر من مذلة الجهل..!!
‏* لما تقدر تتصل في أي وقت بأهلك تطمنهم عليك وتطمن عليهم ده ستر من مذلة الوحدة.!!
* لما تكون عندك أي وظيفة حتي لو بياع جرايد زي حالتي بس مش بتمد ايدك لحد ده ستر من مذلة السؤال..!!
* لما يكون ابناءك ربنا مباركهم في صحتهم وتعليمهم وبيتهم ده ستر من مذلة القهر..!!
* لما يكون عندك زوجة بنت حلال وشايلة معاك
الهم ده ستر من مذلة الراجل قدام مراته..!!
تذكر يا أبني ….
الستر مش ستر فلوس الستر ستر نفوس..
وتملك نِعَم يتمناها ملايين‏ البشر إنها نعمة الستر

اللهم ألبسنا حلل الستر والأمن والأمان والخير والبركة وانزع عنا الهموم والوباء والشرور..
جعلنا الله وإياكم من المستورين بستره الجميل..
اللهم.. أدم علينا سترك دنيا وآخرة..