إختار الناس الصح

 بقلم / رحاب سماحه

محاولة نجاحك في عملك وحياتك وشغلك وأنك عايز تنجح وتتقدم أكتر وأكتر في مجالك، بيبقى في عوامل كتير سلبية وأيجابية مرتبطة بالناس اللي حواليك من قريب أو بعيد ، بيبقى جمبك شخصيات مختلفة منها اللي بيحبك واللي بيكرهك واللي بيفكر أزاي يوقف نجاحك واللي بيحاسبك على كل خطوة بتعملها من دافع النجاح ولكنها بتتفسر ألف تفسير غلط ضدك، وناس بتفرح لنجاحك وعايزاك تكون أحسن حد في الدنيا بتشجعك وهي مأمنه بيك وواثقة فيك…!

عمرك ما هتمشي الطريق كدة من غير شوك ولا مطبات، بس قدام عزيمتك وأرادتك تقدر تتغلب عليها بالصبر والعمل، ورغم عقبات الناس اللي حواليك اللي بتبقى عاملة زي الحبل المشدود حوالين رقبتك مع كل خطوة نجاح بتشد الحبل أكتر ، وهنا بس بتظهر المعادن وتوضح الرؤية ، وهتقدر تصنف الناس اللي جمبك وهتعرف وراء كل قناع الشخص ده بيحبك ولا بيكرهك، عايز مصلحتك ولا عايزك محبط ومع كل فرصة نجاح عايز يحبطك ويشتت بالك وخلاص…!

متخليش الناس السلبية دي تحبطك أو شرهم يوقف طموحك، متخليش إيمانك بنفسك مرتبط بناس بتعد عليك أنفاسك وكلامك، خلي حواليك الناس اللي بتحبك اللي واثقة فيك وف موهبتك وعملك، الناس اللي وقت ما تتعب تمد أيديها ليك علشان تشدك وتقويك وتقدر تكمل الطريق ، حوالينا ناس كتير بألف شكل بس المهم تعرف تختار منهم الناس الصح، اللي هتكون دعم وسند ليك علشان تنجح وتحقق أحلامك، وتفرح معاك في آخر الطريق …!