أكيد أول ما نقرا العنوان ده هنفتكر عادل إمام بس مش هو ده اللى أنا أقصده المقصود هنا مبلغ ال 5 جنيه إللى بتدفعها المدرسه فى الحصه لكل مدرس حديث وعايز يشتغل يعنى بإختصار كده الطالب يذاكر طول الليل وبعد كده يدخل الجامعه ويطلع عينه 4 سنين وبرضوا بمصاريف تقسم الوسط وفى الاخر يفضل الطالب او الطالبه المتخرجين حديثا فى انتظار التعين من غير فايده ويضطروا آسفين للتعين فى اى مكان عشان يحاولوايقللوا المصاريف على الاهالى وطبعا مفيش حاجه سهله عليهم غير المدرسه والتدريس بس يا عينى ( ب 5 جنيه ) يا بلاش !! دى الشهاده طلعت ليها قيمه صحيح ولو مكنش معاهم الشهاده مكنوش خدوها بس تعالوا نحسبها كده يا ترى ال5 جنيه هتكفى مصاريفهم تعالوا نشوف كده البنت هتعمل ايه هتشيل 2 جنيه على جنب للجهاز ، وجنيه فطار ، وجنيه مواصلات وجنيه تساعد بيه الاسره ( هى مش بتشتغل دلوقتى ) يا بلاش !! دى ميزانيه مظبوطه بس مفيش فيها مكان للعلاج ولا للبس ولا المكياج ( إللى هيجيب العريس) تعالوا بقى نشوف الولد هيعمل إيه بالمبلغ الجامد ده .. أولوياته كالتالى: (جنيه ساندويتش فول عشان يصمد معاه ،كوبايه شاى بجنيه ،جنيه لنص المواصلات ) والباقى يكملوا موتو رجل المشى رياضه برضوا ،هاا كده باقى كام .. ااااااه (2جنيه) ياااااااه ده مبلغ يدوب يتحوش عشان الشبكه والشقه يدوب يكفوا يالتيله بالذمه ده مش حرام يا ترى بعد كام سنه هيحوش عشان يتجوز زى أى واحد فى سنه قولولى بقى تعجيز ده ولا لاء والله الشباب دول مساكين ونرجع نلومهم لو سافروا برا هاقول إيه : لا يسعنى سوى الدعاء لهم ، والنبى أدعوا معانا (يارب يوسع رزقهم ويخلى الحصه ب15 جنيه بدل 5 جنيه قولوا امين) “اللهم إنى لا أسالك رد القضاء ولكن أسألك اللطف فيه ” والسلام عليكم ورحمه الله وبركاته ، ومنجلكوش فى حاجه وحشه : ســــلام بقـــــــــــــى ……..
