بَقِـيـتِ فِـيـــنْ

الشاعر د ناصر الدسوقي

وكنتـى تمـشـــى وشـالِك على كـِتــافِـكْ
دلعـانـه وعحبـانـه
تِخَـطِّـى برجلك يِـدُق خُلخالِكْ
يِحَـرَّك السَّاكـِن يا خيلانه
وضحكتـك زى النسيـم تِشفـى العـليـل
وإنـتِ اللى صَفْيَـانَـهْ
ما أنتِ الوحيـده دون البنـات
تقولشــ خَرَطِـكْ وإتمَـدِّدْ مَــاتْ
ما إنـتِ الجميلـة
إنــتِ الوحيـدة يا خــايلـه اللـي
تُـوبـِكْ كَاسِـى من دون البِنِتَّــه
والكُل كان مـاشـي جـاهِـل وحافِي
إلا أنـتِ يا عايقـه راكبــه الكَـرِتَّــه
والكُل كانـت عينُـه عليكِ وحاسـدِينِـك
م العين قَوِيَّـه وهتاكُل مِـن الجمال حِتَّه
والإسم مِن ربِّـك جميل
وبسمِتِـك تشفِى العـلـيـل
والكُل بعـدِك بيـوت وأنتِ اللـي عِيلَـه
بَـس يا عايقـه دار بيكـِ الزّمـن
ومكانـش ده حـالِـك ومحتــالِك
إيه الحكـايه ؟.
كِبـرتِ وعجَّـزتِ ’ شِختِ وشَخْشَخْتِ
وسِكِـت مِن الـدَّق خُـلخـالِك
إيه الحكـايه بـس ؟
كتمتِ ليـه الحِـسْ ؟!
ده الكُل حاسِس وإتغيَّرِت أحوالِك
وخايـف أقـول هتقـولِ عِـيـبَـه
يا عايقـه فيـن الجمـال والهِيـبـه ’
مالِـك عَـلِيلَــهْ ؟.
– بقـا أنتتِ هِيَّـه ؟ !
شَكلِي بَفْتِكِر أحـلام كانت مِعـدِّيه
ومصـروفي اللى كان بالقـرش
فاكـره القـرش ؟ أنا فاكـرُه
أشتِـرى وبِكَيِّـلْ
فرحان م أنا عَيِّـلْ
وِبَشِيـلْ الباقِي تحـتِ البِرْشِ
البـِرش اللى ضهـرِي عليه وَلَّـفْ
م أنا ضهـرِي خلاص حَـلَّـفْ
وِالبِـرْدَهْ كانِت فَـرْشْ
أقـولِك ’ خلينى فى القـرش والشِّلِـن الأصفـر
مانا بتـقهَّـر وبِتحَـسَّـر
يااااااااااه ’ أحـلام جميلـة
وِخُد يا ولدِى الشِلِـن هـاتلـى زِبْـدَه وفـول
أروح علطـول والباقى تعـرِيفـه أعشـم أنا فيهـا
وِمـرَّه تاني بِتـدِّينِـي ’ ولا يوم سـألتِ
ولا مَـرَّه تحـاسبيني وأنا قـروشي مِـدَسِّيهَــا
فـى حَصَّـاله حِلـوه بالـكـوز الصفيـح
بَـقِـتْ بـريـزه ، والله عـال ’
ياه ع الجمـال ’ وفى لحظـه بَخَـفِـيهَـا
وأمِـد إيـدِي ’ بِقـرش لِعَـمْ الرَّشيـدِي ’ وِيزَوِّدْ السَّمْنَــهْ وِيِرمِي فى السُّكَـر ’
أقُـولُّـه كمـأنْ أكتَـرْ ’ فاكْـرَه البِليلَـهْ
لكـن دِلوقتـى قوليلى مالِـك ’
جَبِـرتِ وِقسِيتِ على عِـيالِكْ
ومبقـاشْ لِيكِ وسطِ البنـاتْ قِيمَـهْ
ده حتـى الصغيـر اللى كان على الحيطه بيِتَّكَّـا ’
جابِـكْ وِعَـدَّى وعليكِ بَيِتَّكَّـا ’ وِبَقَـا بِعـزيمـةْ
سِبتِ مَكَـانِكْ وعَمَّـالَه تِـِتـسَكْسَكِي ’ وبالقيـود بَتِـتـربَّطِي وِتـتحسَّـكِي ’
بقيتِ ليـه هبلـه وغـشـيـمـهْ
مَ كُـلْ الناس لِعيـالهـا بِتْـدَلَّـعْ وِبـِتـدَادِي
لكن أنتِ فِينـا تِولَّعِي عادِي’
يا ليلتي الطـويلــةْ
بقيتِ فيـن وفيـن مكانِكْ ؟
وفيـن الـدَّفـا اللي كان فى أحضـانِـكْ
فيـن المِحَنَّـه وفيـن جمـالِ الـوِشْ
بقيتِ فيـن وإيـه اللـى جَــرَى ؟
الكُل عَدَّى وأنتِ الوحيده اللي قاعده ورا ’ والــوِشْ بِيكَـرْمِــشْ
قـوليلـي طيِّبْ ’
ده أنا اللـي كُنـتِ بِتقـولِـى يـا حِبَـيِّـبْ
الناس فلـوسهـا ورق ’ وِأنـتِ فلـوسِـك قَــشْ
خـلاص يا غـاليـه ’ حـتـى الِجِنيـه إتـغــشْ ’ بِتـاكلِـى لِيـه وبتحِـشِّي فِينـا حَـشْ ’
بقـيـتِ بخيلـه ْ
ده أنا كُنت بَمشِي رافِـع راسي
وبقـول جميلــةْ
وِبتبــاهـا وَسـط النـاسْ
دلـوقتي لا بقـا لِـيَّـهْ قِيمَــهْ ولا لِيكِ وبَقِـيـت بِـعِـلَّــهْ ’
زَىْ اللـي راسِـي تـحـتِ مَـدَاسْ
وقــال إيـه مِـلازمِـينِـكْ ’
وِنَـهَـبُـو يا غاليـه فَـدَادِينِـكْ
بـسْ إنتِ فِيـنْ ’
مِشْ تِبقِى تِـفْـرِزِى الحُـرَّاسْ
هقـولِكْ ووالله هَحْكِي الجَـدْ ’
البيـت هَـيِـِفْـضَـا
وِمش هتـلاقي جَنْبِـكْ حَـدْ ’
يا غاليـهْ لِـمِّــي العِـيـلَــةْ
معلِـش ’ بَـتـوسَّـعْ شِـويَّـه معـاكِ
ده أناموجُـوع والدُنيـا دَاقِــتْ
وِمـشْ عـارِفْ أجِيـبْ لُقمَــهْ
مِـنْ تَعَـبِـى بَـتْـكِـى جَنبِـى
واللـهِ مِـشْ حَـاسِـسْ ’
وِعَشَانْ ألاحِقْ بَصْحَى مِـنْ النِّجْمَه
ما الإِيــدْ قَصِيــرَهْ
وِمِـشْ قـادِر أَجِيــبْ الجـدِيـد
خـلاص يِـبـقَـا مـتـزودِيهـاشْ وحـافـظـيـلِـي ع الهِـدْمَــهْ
مِـش لازِم تِجِيبِـي العَـبطْ
وِتخَسَّـرِينِي الجِلـدْ والسَّقَـط
هنمُــوتْ يـا شِيـخَــهْ ’جَـتـْنَـا نِيـلَــهْ
لكـن واللـهِ م أنـا خـايِـف
هَـتْـشِــدِّي حِيلِـكْ أنا عـارِفْ
وهتـلاعـبِـيـنَـا زَىِّ زَمــانْ
هـتـقُـومـب يا أمَّــهْ
وهَـتْفُـوقِـي مِـنِ الغُـمَّـهْ
دَه أنتـتِ السَّفينــهْ
كالنَّـاقـهْ وكالـقُـعْــدَانْ
بَـس إنـتِ جُـودِي
يا كـريمَـه داقِـتْ قُيُــودِي
وأنا هَـعْـمِـلْ نَــدْرْ
هَـدْبَـحْ عَـنْـزَهْ وِجُـوزْ جِِـدْيَـانْ
وِنْعَـشِّـي فِيـهْ كُـلْ اللـى مِـشْ قـادِرْ
وِكُـلْ المَـرِيـضْ اللـى بِـيـهَـابِـرْ
مـا أنــتِ الأصيـلَـــةْ …

بَقيتِ فين
من ديوان. بقيتِ فين
عاميه
الشاعر د ناصر الدسوقي